ರಾಜ್ಯ ಸರ್ಕಾರಿ ನೌಕರರಿಗೆ ಗುಡ್ ನ್ಯೂಸ್: 'ಆರೋಗ್ಯ ಸಂಜೀವಿನಿ' ಯೋಜನೆಗೆ ಕೇಂದ್ರದ ಪರಿಷ್ಕೃತ ದರ ಅಳವಡಿಕೆ!

ರಾಜ್ಯ ಸರ್ಕಾರಿ ನೌಕರರಿಗೆ ಗುಡ್ ನ್ಯೂಸ್: 'ಆರೋಗ್ಯ ಸಂಜೀವಿನಿ' ಯೋಜನೆಗೆ ಕೇಂದ್ರದ ಪರಿಷ್ಕೃತ ದರ ಅಳವಡಿಕೆ!

ರಾಜ್ಯ ಸರ್ಕಾರಿ ನೌಕರರು ಮತ್ತು ಅವರ ಕುಟುಂಬದ ಅವಲಂಬಿತ ಸದಸ್ಯರಿಗೆ ನಗದು ರಹಿತ ವೈದ್ಯಕೀಯ ಚಿಕಿತ್ಸೆ ಒದಗಿಸುವ ಮಹತ್ವಾಕಾಂಕ್ಷಿ 'ಕರ್ನಾಟಕ ಆರೋಗ್ಯ ಸಂಜೀವಿನಿ' (KASS) ಯೋಜನೆಗೆ ಸಂಬಂಧಿಸಿದಂತೆ ರಾಜ್ಯ ಸರ್ಕಾರವು ಅತ್ಯಂತ ಮಹತ್ವದ ಆದೇಶ ಹೊರಡಿಸಿದೆ. ಕೇಂದ್ರ ಸರ್ಕಾರದ 2025ರ ಪರಿಷ್ಕೃತ ಸಿಜಿಹೆಚ್‌ಎಸ್ (CGHS 2025) ವೈದ್ಯಕೀಯ ಚಿಕಿತ್ಸಾ ವಿಧಾನಗಳು ಹಾಗೂ ದರಗಳನ್ನು ಈ ಯೋಜನೆಗೆ ಅಳವಡಿಸಿಕೊಳ್ಳಲು ಸರ್ಕಾರ ಅಧಿಕೃತ ಮಂಜೂರಾತಿ ನೀಡಿದೆ.

ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆಯ (ಸೇವಾ ನಿಯಮಗಳು-3) ಉಪಕಾರ್ಯದರ್ಶಿ ಎಸ್.ಆರ್.ಶಿವಶಂಕರ್ ಅವರು ಈ ಆದೇಶವನ್ನು ಹೊರಡಿಸಿದ್ದಾರೆ.

ನಗದು ರಹಿತ ಯೋಜನೆ: ಹಂತ ಹಂತದ ಅನುಷ್ಠಾನ

ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆಯ ವ್ಯಾಪ್ತಿಯಲ್ಲಿರುವ ಸುವರ್ಣ ಆರೋಗ್ಯ ಸುರಕ್ಷಾ ಟ್ರಸ್ಟ್ (SAST) ಮುಖಾಂತರ ಈ ನಗದುರಹಿತ ಯೋಜನೆಯನ್ನು ಹಂತ ಹಂತವಾಗಿ ಅನುಷ್ಠಾನಗೊಳಿಸಲಾಗುತ್ತಿದೆ. ಯೋಜನೆಯ ಪ್ರಥಮ ಹಂತದಲ್ಲಿ ಒಳರೋಗಿ ಚಿಕಿತ್ಸೆಗಳಿಗೆ ಹಾಗೂ 40 ವರ್ಷ ಮೀರಿದ ನೌಕರರ ವಾರ್ಷಿಕ ಆರೋಗ್ಯ ತಪಾಸಣೆಗಳಿಗೆ ಅವಕಾಶ ನೀಡಲಾಗಿದೆ.

ಸರ್ಕಾರದ ಮಾಹಿತಿ ಪ್ರಕಾರ, ಇದುವರೆಗೆ ಒಟ್ಟು 3,76,955 ನೌಕರರು ಈ ಯೋಜನೆಗೆ ಒಪ್ಪಿಗೆ (opt-in) ನೀಡಿದ್ದು, 23,081 ನೌಕರರು ಯೋಜನೆಯಿಂದ ಹೊರಗುಳಿದಿದ್ದಾರೆ (opt-out).

ಹೊಸ ದರಗಳ ಪರಿಷ್ಕರಣೆ:

ಕೇಂದ್ರ ಸರ್ಕಾರವು ದಿನಾಂಕ 03.10.2025 ರಂದು ಹೊರಡಿಸಿದ್ದ ಅಧಿಕೃತ ಜ್ಞಾಪನದನ್ವಯ ಈ ಹಿಂದಿನ 2014ರ ಸಿಜಿಹೆಚ್‌ಎಸ್ ದರಗಳನ್ನು ಪರಿಷ್ಕರಿಸಲಾಗಿತ್ತು. ಆ ಪರಿಷ್ಕೃತ ಹೊಸ ಕೋಡ್‌ಗಳ ಅನ್ವಯ ಒಟ್ಟು 1998 ಚಿಕಿತ್ಸಾ ವಿಧಾನಗಳಿಗೆ ಹೊಸ ದರಗಳನ್ನು ನಿಗದಿಪಡಿಸಲಾಗಿದ್ದು, ಇದನ್ನು ಈಗ 'ಕರ್ನಾಟಕ ಆರೋಗ್ಯ ಸಂಜೀವಿನಿ' ಯೋಜನೆಗೆ ಯಥಾವತ್ತಾಗಿ ಅಳವಡಿಸಿಕೊಳ್ಳಲಾಗುತ್ತಿದೆ.

ವಾರ್ಡ್ ಆಧಾರಿತ ದರ ವ್ಯತ್ಯಾಸ:

ಹೊಸ ದರಗಳನ್ನು ಪ್ರಮುಖವಾಗಿ ಅರೆ ಖಾಸಗಿ (Semi-Private) ವಾರ್ಡ್‌ಗಳಿಗೆ ನಿಗದಿಪಡಿಸಲಾಗಿದೆ. ಖಾಸಗಿ ವಾರ್ಡ್ (Private ward) ಹಾಗೂ ಸಾಮಾನ್ಯ ವಾರ್ಡ್ (General ward)ಗಳಿಗೆ ಈ ದರಗಳಲ್ಲಿ ಕ್ರಮವಾಗಿ ಶೇಕಡ 5 ರಷ್ಟು ಏರಿಕೆ ಹಾಗೂ ಶೇಕಡ 5 ರಷ್ಟು ಇಳಿಕೆ ಮಾಡಲಾಗಿರುತ್ತದೆ.

ನಗರಗಳ ಶ್ರೇಣಿ ಆಧಾರಿತ ಪಾವತಿ:

ಕೇಂದ್ರ ಸರ್ಕಾರದ ವರ್ಗೀಕರಣದಂತೆ Tier-I ನಗರಗಳ (ಬೆಂಗಳೂರು ನಗರ ವ್ಯಾಪ್ತಿ) ಆಸ್ಪತ್ರೆಗಳಿಗೆ ಶೇ. 100 ರಷ್ಟು ಸಂಪೂರ್ಣ ಮೊತ್ತ ಪಾವತಿಯಾಗಲಿದೆ. Tier-II ನಗರಗಳಾದ ಬೆಳಗಾವಿ, ಹುಬ್ಬಳ್ಳಿ-ಧಾರವಾಡ, ಮಂಗಳೂರು, ಮೈಸೂರು ಮತ್ತು ಕಲಬುರಗಿ ಆಸ್ಪತ್ರೆಗಳಿಗೆ ಶೇ. 90 ರಷ್ಟು ಹಾಗೂ ಉಳಿದ Tier-III ನಗರಗಳ ಆಸ್ಪತ್ರೆಗಳಿಗೆ ಶೇ. 80 ರಷ್ಟು ಮೊತ್ತವನ್ನು ಪಾವತಿಸಲು ಅವಕಾಶ ಕಲ್ಪಿಸಲಾಗಿದೆ.

ಸರ್ಕಾರದ ಪ್ರಮುಖ ಷರತ್ತುಗಳು ಮತ್ತು ನಿಯಮಗಳು

ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಗಳಿಗೆ ಹೆಚ್ಚುವರಿ ದರವಿಲ್ಲ: ರಾಜ್ಯ ಸರ್ಕಾರದ ನಿಯಮಾವಳಿಗಳಲ್ಲಿ ಸೂಪರ್-ಸ್ಪೆಷಾಲಿಟಿ ಆಸ್ಪತ್ರೆಗಳನ್ನು ಅಧಿಕೃತವಾಗಿ ವ್ಯಾಖ್ಯಾನಿಸದ ಕಾರಣ, ಕೇಂದ್ರದ ನಿಯಮದಂತೆ ಅವರಿಗೆ ಶೇ. 15 ರಷ್ಟು ಹೆಚ್ಚುವರಿ ದರ ಪಾವತಿಸಲು ಸಾಧ್ಯವಿಲ್ಲ. ಒಂದು ವೇಳೆ ಸದರಿ ಆಸ್ಪತ್ರೆಗಳು NABH ದೃಢೀಕರಣ ಹೊಂದಿದ್ದರೆ, ಸಾಮಾನ್ಯ NABH ಆಸ್ಪತ್ರೆಗಳಿಗೆ ನಿಗದಿಪಡಿಸಿರುವ ದರಗಳನ್ನೇ ಪಾವತಿಸಲಾಗುವುದು.

ವೈದ್ಯಕೀಯ ವೆಚ್ಚ ಮರುಪಾವತಿ ಅವಧಿ ಮುಂದುವರಿಕೆ: ಕರ್ನಾಟಕ ಆರೋಗ್ಯ ಸಂಜೀವಿನಿ ಯೋಜನೆಯು ಪೂರ್ಣ ಪ್ರಮಾಣದಲ್ಲಿ ಅನುಷ್ಠಾನಗೊಳ್ಳದ ಕಾರಣ, ಹಳೆಯ ವ್ಯವಸ್ಥೆಯಾದ 'ವೈದ್ಯಕೀಯ ವೆಚ್ಚ ಮರುಪಾವತಿ' (Medical Reimbursement) ಸೌಲಭ್ಯವನ್ನು ದಿನಾಂಕ 23.03.2026 ರಿಂದ 22.09.2026 ರವರೆಗೆ ಮತ್ತೆ ಆರು ತಿಂಗಳ ಅವಧಿಗೆ ವಿಸ್ತರಿಸಲಾಗಿದೆ. ಆದರೆ, ಈ ಮರುಪಾವತಿಯನ್ನು ಹಳೆಯ 2014ರ ಸಿಜಿಹೆಚ್‌ಎಸ್ ದರಗಳಲ್ಲೇ ಮಾಡಲಾಗುವುದು. ಹೊಸ ಪರಿಷ್ಕೃತ ದರಗಳು ಕೇವಲ ನಗದು ರಹಿತ ಸಂಜೀವಿನಿ ಯೋಜನೆಗೆ ಮಾತ್ರ ಅನ್ವಯಿಸುತ್ತವೆ.

90 ದಿನಗಳೊಳಗೆ ಒಡಂಬಡಿಕೆ: ಯೋಜನೆಯಡಿ ನೋಂದಾಯಿಸಲ್ಪಟ್ಟಿರುವ (Empanelled) ಎಲ್ಲಾ ಆಸ್ಪತ್ರೆಗಳೊಂದಿಗೆ ಮುಂದಿನ 90 ದಿನಗಳ ಒಳಗಾಗಿ ಹೊಸ ಪರಿಷ್ಕೃತ ದರಗಳ ಅನ್ವಯ ಸೂಕ್ತ ಒಡಂಬಡಿಕೆಯನ್ನು (MoU) ಮಾಡಿಕೊಳ್ಳುವಂತೆ ಸುವರ್ಣ ಆರೋಗ್ಯ ಸುರಕ್ಷಾ ಟ್ರಸ್ಟ್‌ಗೆ ಸರ್ಕಾರ ಆದೇಶಿಸಿದೆ.

ರಾಜ್ಯ ಸರ್ಕಾರದ ಈ ಮಹತ್ವದ ನಿರ್ಧಾರದಿಂದಾಗಿ ಗುಣಮಟ್ಟದ ನಗದು ರಹಿತ ಚಿಕಿತ್ಸೆ ಪಡೆಯುತ್ತಿರುವ ಲಕ್ಷಾಂತರ ರಾಜ್ಯ ಸರ್ಕಾರಿ ನೌಕರರಿಗೆ ಹಾಗೂ ಅವರ ಕುಟುಂಬದವರಿಗೆ ನಿಗದಿತ ಚಿಕಿತ್ಸಾ ವೆಚ್ಚಗಳ ಹಂಚಿಕೆಯಲ್ಲಿ ಹೆಚ್ಚಿನ ಅನುಕೂಲವಾಗಲಿದೆ.