ಕರ್ನಾಟಕ ಆರೋಗ್ಯ ಸಂಜೀವಿನಿ ಯೋಜನೆ (KASS): ಸರ್ಕಾರಿ ನೌಕರರ ಆತಂಕಕ್ಕೆ ಕಾರಣವೇನು..? ಯೋಜನೆ ಬೋಗಸ್ ಅಂಶಗಳ ಪಟ್ಟಿ ಇಲ್ಲಿದೆ

ಕರ್ನಾಟಕ ಆರೋಗ್ಯ ಸಂಜೀವಿನಿ ಯೋಜನೆ (KASS): ಸರ್ಕಾರಿ ನೌಕರರ ಆತಂಕಕ್ಕೆ ಕಾರಣವೇನು..? ಯೋಜನೆ ಬೋಗಸ್ ಅಂಶಗಳ ಪಟ್ಟಿ ಇಲ್ಲಿದೆ

ಸರ್ಕಾರಿ ನೌಕರರ ಆತಂಕ: ಕರ್ನಾಟಕ ಆರೋಗ್ಯ ಸಂಜೀವಿನಿ ಯೋಜನೆಯ (KASS) ನುಂಗಲಾರದ ಅಂಶಗಳು

ಕರ್ನಾಟಕ ರಾಜ್ಯ ಸರ್ಕಾರವು ಸರ್ಕಾರಿ ನೌಕರರಿಗಾಗಿ ಕರ್ನಾಟಕ ಆರೋಗ್ಯ ಸಂಜೀವಿನಿ ಯೋಜನೆ (KASS) ಎಂಬ ಹೊಸ ಆರೋಗ್ಯ ಯೋಜನೆಯನ್ನು ಪರಿಚಯಿಸಿದೆ. ಉಚಿತ ಕ್ಯಾಶ್‌ಲೆಸ್ ಚಿಕಿತ್ಸೆಯ ಉದ್ದೇಶವನ್ನು ಹೊಂದಿದೆ ಎಂದು ಆರಂಭದಲ್ಲಿ ವ್ಯಾಪಕ ಪ್ರಚಾರ ನೀಡಲಾಗಿತ್ತು. ಈ ಯೋಜನೆಯ ಅನೇಕ ಅಂಶಗಳು ನೌಕರರಿಗೆ ಅನುಕೂಲಕರವಾಗಿಲ್ಲ ಎಂಬ ಆತಂಕಗಳು ಈಗ ವ್ಯಕ್ತವಾಗಿವೆ.

ಈ ಯೋಜನೆಯ ಅಡಿಯಲ್ಲಿ ನೌಕರರು ಈಗ ನೀಡಲಾಗುತ್ತಿರುವ ರೂ.500 ವೈದ್ಯಕೀಯ ಭತ್ಯೆಯನ್ನು ಕಳೆದುಕೊಳ್ಳಬೇಕಾಗುತ್ತದೆ. ಇದಲ್ಲದೆ ಯೋಜನೆಗೆ ಮಾಸಿಕ ಚಂದಾವನ್ನು ಪಾವತಿಸಬೇಕಾಗುತ್ತದೆ. ಗ್ರೂಪ್ C ನೌಕರರಿಗೆ ಒಟ್ಟು ರೂ.850 ಪ್ರತಿ ತಿಂಗಳು ನಷ್ಟವಾಗುತ್ತದೆ. ಆದರೂ ಸಹ, ಔಟ್ ಪೇಷೆಂಟ್ (OPD) ಚಿಕಿತ್ಸೆಯನ್ನು ಯೋಜನೆ ಒಳಗೊಂಡಿಲ್ಲ. ಮಣಿಪಾಲ್ ಆಸ್ಪತ್ರೆ ಸೇರಿದಂತೆ ಅನೇಕ ಪ್ರಸಿದ್ಧ ಆಸ್ಪತ್ರೆಗಳು ಯೋಜನೆಗೆ ಒಳಪಟ್ಟಿಲ್ಲ. ಉದಾಹರಣೆಗೆ ಉಡುಪಿ ಜಿಲ್ಲೆಯಲ್ಲಿ ಕೇವಲ ಒಂದು ಕಣ್ಣಿನ ಆಸ್ಪತ್ರೆಯಷ್ಟೇ ಪಟ್ಟಿಯಲ್ಲಿದೆ.

ಇದಲ್ಲದೆ, ಪ್ಯಾಕೇಜ್ ದರಗಳು ಅತಿ ಕಡಿಮೆ ಆಗಿದ್ದು, ಗ್ರೂಪ್ C ಮತ್ತು D ನೌಕರರಿಗೆ ವಿಶೇಷ ವಾರ್ಡ್ ಚಿಕಿತ್ಸೆ ಅನುಮತಿಸಲ್ಪಟ್ಟಿಲ್ಲ. ಪೋಷಕರ ಆದಾಯ ರೂ.27,000/- ಮೇಲ್ಪಟ್ಟಿದ್ದರೆ ಅವರು ಪ್ರಯೋಜನ ಪಡೆಯಲು ಅರ್ಹರಾಗಿರುವುದಿಲ್ಲ. ಆರಂಭದಲ್ಲಿ ಈ ಯೋಜನೆಯನ್ನು ಉಚಿತ ಕ್ಯಾಶ್‌ಲೆಸ್ ಯೋಜನೆ ಎಂದು ಪ್ರಚಾರ ಮಾಡಲಾಗಿದ್ದರೂ, ಈಗ ನೌಕರರಿಂದ ಮಾಸಿಕ ಚಂದಾ ವಸೂಲಾಗುತ್ತಿದೆ. ಇದು ವಾಸ್ತವದಲ್ಲಿ ಆರೋಗ್ಯ ವಿಮೆ ಯೋಜನೆಯಷ್ಟೇ ಆಗಿದೆ.

ಯೋಜನೆಯ ಅಡಿಯಲ್ಲಿ ಎಲ್ಲ ರೋಗಗಳು ಒಳಗೊಂಡಿಲ್ಲ; ಮತ್ತು ‘ಕ್ಯಾಶ್‌ಲೆಸ್’ ಪ್ರಯೋಜನ ಪ್ಯಾಕೇಜ್ ಮಿತಿಯೊಳಗೆ ಮಾತ್ರ ಲಭ್ಯ. ಹೆಚ್ಚುವರಿ ವೆಚ್ಚವನ್ನು ನೌಕರರು ಭರಿಸಬೇಕಾಗಿದೆ. ಹಳೆಯ ವೈದ್ಯಕೀಯ ಮರುಪಾವತಿ ಯೋಜನೆ ಹೆಚ್ಚು ಪರಿಣಾಮಕಾರಿ ಮತ್ತು ನೌಕರ ಸ್ನೇಹಿಯಾಗಿತ್ತು ಎಂಬ ಅಭಿಪ್ರಾಯವು ವ್ಯಕ್ತವಾಗಿದೆ.

ಸರ್ಕಾರಿ ನೌಕರರು ಸರ್ಕಾರವನ್ನು ಯೋಜನೆಯನ್ನು ಮರುಪರಿಶೀಲಿಸಲು, ಎಲ್ಲಾ ಪ್ರಮುಖ ಆಸ್ಪತ್ರೆಗಳನ್ನು ಸೇರಿಸಲು ಮತ್ತು ನೌಕರರ ಮೇಲೆ ಯಾವುದೇ ಹಣಕಾಸು ಭಾರ ಬಾರದಂತೆ ಕ್ರಮ ಕೈಗೊಳ್ಳಲು ಒತ್ತಾಯಿಸಿದ್ದಾರೆ.

ಹಿಂದಿನ ವೈದ್ಯಕೀಯ ಮರುಪಾವತಿ ಯೋಜನೆ ಹೆಚ್ಚು ಸ್ಪಷ್ಟತೆ, ಪ್ರಯೋಜನ ಹಾಗೂ ಸಮಾನತೆ ಒದಗಿಸಿತ್ತು. ಹೊಸ ಯೋಜನೆಯ ಅಡಿಯಲ್ಲಿ ನೌಕರರಿಗೆ ನಷ್ಟವಾಗುತ್ತಿದ್ದು, ಸರ್ಕಾರವು ಮಾಸಿಕವಾಗಿ ಕೋಟ್ಯಂತರ ರೂಪಾಯಿಗಳನ್ನು ವಸೂಲಿ ಮಾಡಿಕೊಳ್ಳುತ್ತಿದೆ.

ಅದಕ್ಕಾಗಿ ಯೋಜನೆಯ ಸಂಪೂರ್ಣ ಮರುಪರಿಶೀಲನೆ ಹಾಗೂ ಪರಿಷ್ಕರಣೆ ಆಗಬೇಕು ಎಂಬುದು ನೌಕರರ ಬೇಡಿಕೆ ಆಗಿದೆ. ನೌಕರರ ಮನವಿಗೆ ಸ್ಪಂದಿಸಿದ ಸರಕಾರವು ಯೋಜನೆಗೆ ಒಳಪಡಲು ಅಥವಾ ಒಳಪಡದೆ ಇರಲು ನಿಗದಿಪಡಿಸಿದ ದಿನಾಂಕವನ್ನು 25.11.2025 ರ ವರೆಗೆ ವಿಸ್ತರಿಸಿದೆ.

ಆರೋಗ್ಯ ಸಂಜೀವಿನಿ ಯೋಜನೆ ಎಲ್ಲಾ ಪ್ರಮುಖ ಆಸ್ಪತ್ರೆಗಳನ್ನು ಹಾಗೂ ಚಿಕಿತ್ಸಾ ವಿಭಾಗಗಳನ್ನು ಒಳಗೊಳ್ಳಬೇಕು. ಆರೋಗ್ಯ ಸಂಜೀವಿನಿ ಯೋಜನೆಗೆ ಒಳಪಡಲು ಇಚ್ಚಿಸದ ನೌಕರರಿಗೆ ಹಳೆಯ ಮರುಪಾವತಿ ಯೋಜನೆಯನ್ನು ಮುಂದುವರಿಸಲು ಅವಕಾಶ ನೀಡಬೇಕು. ಹಿಂದಿನಂತೆ ವೈದ್ಯಕೀಯ ಭತ್ಯೆಯನ್ನು ನೀಡಬೇಕು. ನೌಕರರ ಮೇಲೆ ಯಾವುದೇ ಹಣಕಾಸು ಭಾರ ಬಾರದಂತೆ ಕ್ರಮ ಕೈಗೊಳ್ಳಬೇಕು ಎಂಬುದು ನೌಕರರ ಬೇಡಿಕೆ ಆಗಿದೆ.

ಈ ವಿಷಯವನ್ನು ಸರ್ಕಾರ ಗಂಭೀರವಾಗಿ ಪರಿಗಣಿಸಿ ರಾಜ್ಯ ಸರ್ಕಾರವು ನೌಕರರ ಹಿತಾಸಕ್ತಿಯನ್ನು ಕಾಪಾಡುತ್ತದೆ ಎಂಬುದು ನೌಕರರ ಆಶಯವಾಗಿದೆ.