ಕೃತಕ ಬುದ್ದಿಮತ್ತೆ ನಂಬಿ ಪೀಠದೆದುರು ವಾದ: ವಕೀಲರ ಶೋಚನೀಯ ಅವಸ್ಥೆ ಕಂಡು ಸುಪ್ರೀಂ ಕೋರ್ಟ್ ಆತಂಕ

ಕೃತಕ ಬುದ್ದಿಮತ್ತೆ ನಂಬಿ ಪೀಠದೆದುರು ವಾದ: ವಕೀಲರ ಶೋಚನೀಯ ಅವಸ್ಥೆ ಕಂಡು ಸುಪ್ರೀಂ ಕೋರ್ಟ್ ಆತಂಕ

ಕೃತಕ ಬುದ್ದಿಮತ್ತೆಯನ್ನು ನಂಬಿಕೊಂಡು ನ್ಯಾಯಪೀಠಗಳ ಮುಂದೆ ವಕೀಲರು ನಕಲಿ ತೀರ್ಪುಗಳ ಉಲ್ಲೇಖ ಯಾ ವಾದ ಮಂಡನೆ ನಡೆಸುತ್ತಿದ್ದು, ವಕೀಲರ ಅವಸ್ಥೆ ಕಂಡು ಸುಪ್ರೀಂ ಕೋರ್ಟ್ ಆತಂಕ ವ್ಯಕ್ತಪಡಿಸಿದೆ.

ಸುಪ್ರೀಂ ಕೋರ್ಟ್ AI ಮೂಲಕ ತಯಾರಿಸಲಾದ ಅರ್ಜಿಗಳಲ್ಲಿ ನಕಲಿ ಪ್ರಕರಣ ಉಲ್ಲೇಖಗಳನ್ನು ಸಲ್ಲಿಸುತ್ತಿರುವ ವಕೀಲರ ಕುರಿತು ಗಂಭೀರ ಪ್ರಶ್ನೆಯನ್ನು ಎತ್ತಿಹಿಡಿದಿದೆ.

ಮುಖ್ಯ ನ್ಯಾಯಮೂರ್ತಿ ಸೂರ್ಯ ಕಾಂತ್, ನ್ಯಾಯಮೂರ್ತಿ ಜೋಯ್ಮಲ್ಯ ಬಾಗ್ಚಿ ಹಾಗೂ ನ್ಯಾಯಮೂರ್ತಿ ಬಿ.ವಿ. ನಾಗರತ್ನ ಅವರ ಪೀಠದ ಮುಂದೆ ಈ ವಿಚಾರ ಪ್ರಸ್ತಾಪವಾಯಿತು.

“ಕೆಲವು ವಕೀಲರು ಈಗ ಅರ್ಜಿಗಳನ್ನು ತಯಾರಿಸಲು AI ಬಳಸಲು ಆರಂಭಿಸಿರುವುದು ನಮಗೆ ಆತಂಕಕಾರಿ ವಿಷಯವಾಗಿದೆ. ಇದು ಸಂಪೂರ್ಣವಾಗಿ ಅನಾವಶ್ಯಕ,” ಎಂದು ಮುಖ್ಯ ನ್ಯಾಯಮೂರ್ತಿ ಸೂರ್ಯ ಕಾಂತ್ ಹೇಳಿದರು. ನ್ಯಾಯಮೂರ್ತಿ ನಾಗರತ್ನ ಅವರು ಇತ್ತೀಚೆಗೆ “Mercy v. Mankind” ಎಂಬ ಅಸ್ತಿತ್ವದಲ್ಲೇ ಇಲ್ಲದ ಉಲ್ಲೇಖವನ್ನು ನೋಡಿದ್ದಾಗಿ ಹೇಳಿದರು.

ನ್ಯಾಯಮೂರ್ತಿ ದೀಪಂಕರ್ ದತ್ತ ಅವರ ನ್ಯಾಯಾಲಯದಲ್ಲಿಯೂ ಇದೇ ರೀತಿಯ ಘಟನೆ ನಡೆದಿರುವುದಾಗಿ ಸಿಜೆಐ ಉಲ್ಲೇಖಿಸಿದರು. “ಒಂದೇ ಅಲ್ಲ, ಇಂತಹ ಹಲವಾರು ತೀರ್ಪುಗಳನ್ನು ಉಲ್ಲೇಖಿಸಲಾಗಿತ್ತು,” ಎಂದು ಅವರು ಹೇಳಿದರು.

ನ್ಯಾಯಮೂರ್ತಿ ನಾಗರತ್ನ ಮತ್ತೊಂದು ಆತಂಕವನ್ನು ವ್ಯಕ್ತಪಡಿಸಿ, ಕೆಲವೊಮ್ಮೆ ಉಲ್ಲೇಖ ಸರಿಯಾಗಿದ್ದರೂ ತೀರ್ಪಿಗೆ ಸಂಬಂಧಿಸದ ನಕಲಿ ಉಲ್ಲೇಖ ವಾಕ್ಯಗಳನ್ನು ಸೇರಿಸಲಾಗುತ್ತದೆ ಎಂದು ಹೇಳಿದರು. ಇದರಿಂದ ನ್ಯಾಯಮೂರ್ತಿಗಳ ಮೇಲೆ ಹೆಚ್ಚುವರಿ ಹೊರೆ ಬೀಳುತ್ತದೆ ಎಂದು ಅವರು ತಿಳಿಸಿದರು. ಕಳೆದ ವಾರವೂ ನ್ಯಾಯಮೂರ್ತಿ ನಾಗರತ್ನ ಇಂತಹ ನಕಲಿ ಉಲ್ಲೇಖಗಳ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದರು.

ನ್ಯಾಯಮೂರ್ತಿ ಬಾಗ್ಚಿ ಅವರು ಇತ್ತೀಚಿನ ಕಾಲದಲ್ಲಿ ಕಾನೂನು ಬರವಣಿಗೆಯ ಕಲೆ ಹಿನ್ನಡೆಯಾಗಿದೆ ಎಂದು ವಿಷಾದ ವ್ಯಕ್ತಪಡಿಸಿದರು. ಇಂದಿನ ವಿಶೇಷ ಅನುಮತಿ ಅರ್ಜಿಗಳು (SLP) ಬಹುಶಃ ತೀರ್ಪುಗಳ ಉಲ್ಲೇಖಗಳನ್ನಷ್ಟೇ ಒಳಗೊಂಡಿರುತ್ತವೆ ಎಂದು ಅವರು ಗಮನಿಸಿದರು.

ಹಿಂದಿನ ಪೀಳಿಗೆಯ ವಕೀಲರನ್ನು ಸ್ಮರಿಸಿ, ಹಿರಿಯ ವಕೀಲ ಅಶೋಕ್ ಕುಮಾರ್ ಸೇನ್ ಅವರಂತಹ ಮಹಾನುಭಾವರು ನಿಖರ, ಸಂಕ್ಷಿಪ್ತ ಹಾಗೂ ಮೂಲಭೂತ ಬರವಣಿಗೆಯಲ್ಲಿ ಪರಿಣತರಾಗಿದ್ದರು ಎಂದು ಹೇಳಿದರು.

ಇತ್ತೀಚೆಗೆ, AI ಮೂಲಕ ಸೃಷ್ಟಿಸಲಾದ ನಕಲಿ ಉಲ್ಲೇಖಗಳನ್ನು ಬಳಸಿದ ಕಾರಣಕ್ಕೆ ಬಾಂಬೆ ಹೈಕೋರ್ಟ್ ಅರ್ಜಿದಾರರೊಬ್ಬರಿಗೆ ವೆಚ್ಚ ವಿಧಿಸಿತ್ತು.