ಪರಿವರ್ತಿತ ಪಿಂಚಣಿ ಮರುಸ್ಥಾಪನೆ ಅವಧಿ ಬದಲಾವಣೆ: 15 ವರ್ಷದ ನಿಯಮ ಎತ್ತಿಹಿಡಿದ ಹೈಕೋರ್ಟ್‌

ಪರಿವರ್ತಿತ ಪಿಂಚಣಿ ಮರುಸ್ಥಾಪನೆ ಅವಧಿ ಬದಲಾವಣೆ: 15 ವರ್ಷದ ನಿಯಮ ಎತ್ತಿಹಿಡಿದ ಹೈಕೋರ್ಟ್‌

ಪರಿವರ್ತಿತ (ಕಮ್ಯೂಟೆಡ್) ಪಿಂಚಣಿಯ ಮರುಸ್ಥಾಪನೆ ಅವಧಿಯನ್ನು ಬದಲಾಯಿಸುವಂತೆ ಪಿಂಚಣಿದಾರರು ಬೇಡಿಕೆ ಇಡಲು ಸಾಧ್ಯವಿಲ್ಲ; 15 ವರ್ಷದ ನಿಯಮವನ್ನು ಎತ್ತಿಹಿಡಿದ ದೆಹಲಿ ಹೈಕೋರ್ಟ್

ಕರ್ನಾಟಕ ರಾಜ್ಯ ಸರಕಾರಿ ಸೇವೆಯಿಂದ ನಿವೃತ್ತಿ ಹೊಂದುತ್ತಿರುವ ನೌಕರರಿಗೆ ತಮ್ಮ ಪಿಂಚಣಿಯ ಗರಿಷ್ಟ ಮೂರನೇ ಒಂದು ಭಾಗವನ್ನು ಪರಿವರ್ತಿಸಲು ಅವಕಾಶವಿದೆ. ಈ ಅವಕಾಶವನ್ನು ಪ್ರತಿಯೊಬ್ಬ ನೌಕರರೂ ಬಳಸುತ್ತಿದ್ದಾರೆ. ಏಕೆಂದರೆ ನಿವೃತ್ತಿಯ ಸಂದರ್ಭದಲ್ಲಿ ನೌಕರರು ಒಂದು ದೊಡ್ಡ ಮೊತ್ತವನ್ನು ತೆರಿಗೆ ಮುಕ್ತವಾಗಿ ಪಡೆಯಬಹುದು.

ನಿವೃತ್ತಿಯ ಬಳಿಕ 15 ವರ್ಷಗಳ ಕಾಲ ಪಿಂಚಣಿಯಿಂದ ಈ ಪರಿವರ್ತಿತ ಮೊತ್ತವನ್ನು ಕಡಿತಗೊಳಿಸಲಾಗುವುದು. ಆ ಬಳಿಕ ‌ ಪೂರ್ಣ ಪಿಂಚಣಿಯನ್ನು ಸ್ವಯಂಚಾಲಿತವಾಗಿ ಮರುಸ್ಥಾಪಿಸಲಾಗುತ್ತದೆ.

ಒಮ್ಮೆ ಪುನಃಸ್ಥಾಪಿಸಿದ ನಂತರ, ನಿವೃತ್ತರು ತಮ್ಮ ಮೂಲ ಪಿಂಚಣಿಯ ಪೂರ್ಣ 100% ಮೊತ್ತವನ್ನು ಮತ್ತೆ ಪಡೆಯುತ್ತಾರೆ. ಈ 15 ವರ್ಷಗಳ ಅವಧಿ ಮುಗಿಯುವ ಮೊದಲು ಪಿಂಚಣಿದಾರರು ನಿಧನರಾದರೆ, ಕುಟುಂಬ ಪಿಂಚಣಿಯಿಂದ ಯಾವುದೇ ಕಡಿತಗಳನ್ನು ಮಾಡಲಾಗುವುದಿಲ್ಲ. ತುಟ್ಟಿಭತ್ಯೆಯನ್ನು ಪೂರ್ಣ ಮೂಲ ಪಿಂಚಣಿಯ ಮೇಲೆ ಪಾವತಿಸಲಾಗುತ್ತದೆ.

ಪರಿವರ್ತಿತ ಪಿಂಚಣಿ ಮೊತ್ತವನ್ನು ಮೂರು ಅಂಶಗಳಿಂದ ನಿರ್ಧರಿಸಲಾಗುತ್ತದೆ: ಪರಿವರ್ತಿಸಲಾದ ಶೇಕಡಾವಾರು, ಮಾಸಿಕ ಮೂಲ ಪಿಂಚಣಿ ಮತ್ತು ಮುಂದಿನ ಜನ್ಮದಿನದಂದು ವಯಸ್ಸನ್ನು ಆಧರಿಸಿದ ಪರಿವರ್ತನೆ.

ಇತ್ತೀಚಿನ ಕೆಲವು ವರ್ಷಗಳಲ್ಲಿ ಕಮ್ಯೂಟೆಡ್ ಪಿಂಚಣಿಯ ಮರುಸ್ಥಾಪನೆ ಅವಧಿಯನ್ನು ಬದಲಾಯಿಸಲು ಪಿಂಚಣಿದಾರರು ಬೇಡಿಕೆ ಇಟ್ಟಿದ್ದು ಈ ವಿಷಯವು ಹೈಕೋರ್ಟ್ ಮೆಟ್ಟಿಲೇರಿದ್ದು ಪರಿವರ್ತಿತ ಪಿಂಚಣಿಯ ಮರುಪಾವತಿ ಅವಧಿಯನ್ನು ಬದಲಾಯಿಸಲು ಸಾಧ್ಯವಿಲ್ಲವೆಂಬ ಅಭಿಪ್ರಾಯ ವ್ಯಕ್ತಪಡಿಸಿದ ದೆಹಲಿ ಹೈಕೋರ್ಟ್ 15 ವರ್ಷದ ನಿಯಮವನ್ನು ಎತ್ತಿಹಿಡಿದಿದೆ.

ಪಿಂಚಣಿ ಕಮ್ಯೂಟೇಶನ್ ಎನ್ನುವುದು ಕಂತುಗಳಲ್ಲಿ ಮರುಪಾವತಿಸಬೇಕಾದ ವಾಣಿಜ್ಯ ಸಾಲವಲ್ಲ ಎಂದು ದೆಹಲಿ ಹೈಕೋರ್ಟ್ ಸ್ಪಷ್ಟಪಡಿಸಿದೆ. ಕೇಂದ್ರ ನಾಗರಿಕ ಸೇವೆಗಳ (ಪಿಂಚಣಿ ಕಮ್ಯೂಟೇಶನ್) ನಿಯಮಗಳು, 1981ರ ನಿಯಮ 10-ಎ ಅಡಿಯಲ್ಲಿ ನಿಗದಿಪಡಿಸಿರುವ 15 ವರ್ಷದ ಏಕರೂಪ ಮರುಸ್ಥಾಪನೆ ಅವಧಿಯು ಪ್ರತಿಯೊಬ್ಬ ನಿವೃತ್ತ ನೌಕರನಿಗೆ ಪ್ರತ್ಯೇಕವಾಗಿ ಅನ್ವಯಿಸುವ ಗಣಿತಿಯ ಮರುಪಾವತಿ ಅವಧಿಯಲ್ಲ; ಬದಲಿಗೆ ಸಂಪೂರ್ಣ ಪಿಂಚಣಿ ವ್ಯವಸ್ಥೆಯ ಕಾರ್ಯಸಾಧಕ ಸಮತೋಲನ ಕಾಯ್ದುಕೊಳ್ಳಲು ರೂಪಿಸಲಾದ ನೀತಿಯಾಗಿದೆ ಎಂದು ನ್ಯಾಯಾಲಯ ಹೇಳಿದೆ.

ಪಿಂಚಣಿ ಕಮ್ಯೂಟೇಶನ್ ನೀತಿಗೆ ಸಂಬಂಧಿಸಿದ ನ್ಯಾಯಾಂಗ ಪರಿಶೀಲನೆಯು ಸ್ಪಷ್ಟವಾದ ಅನ್ಯಾಯ ಅಥವಾ ಸಂವಿಧಾನಾತ್ಮಕ ದೋಷವಿದೆಯೇ ಎಂಬುದನ್ನು ಪರಿಶೀಲಿಸುವ ಮಟ್ಟಕ್ಕೆ ಮಾತ್ರ ಸೀಮಿತವಾಗಿದೆ. ವೈಯಕ್ತಿಕ ಪಿಂಚಣಿದಾರರು ಮುಂದಿಡುವ ಸರಳ ಹಣಕಾಸಿನ ಲೆಕ್ಕಾಚಾರಗಳ ಆಧಾರದ ಮೇಲೆ ನ್ಯಾಯಾಲಯವು ತಜ್ಞರ ಕಾರ್ಯಸಾಧಕ ನಿರ್ಧಾರಗಳನ್ನು ಬದಲಾಯಿಸಲು ಸಾಧ್ಯವಿಲ್ಲ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.

ಸ್ವಯಂಪ್ರೇರಿತವಾಗಿ ಪಿಂಚಣಿಯ ಒಂದು ಭಾಗವನ್ನು ಕಮ್ಯೂಟ್ ಮಾಡಿಕೊಂಡು, ಕಾನೂನಿನ ಪ್ರಕಾರ ಗಣನೀಯ ಪ್ರಮಾಣದ ತೆರಿಗೆಮುಕ್ತ ಮೊತ್ತವನ್ನು ಪಡೆದಿರುವ ಪಿಂಚಣಿದಾರರು, ಆ ಯೋಜನೆಯ ಪ್ರಯೋಜನವನ್ನು ಉಳಿಸಿಕೊಂಡೇ ನಂತರ ಅದರ ಮರುಸ್ಥಾಪನೆ ಅವಧಿಯನ್ನು ಬದಲಾಯಿಸುವಂತೆ ಕೇಳಲು ಸಾಧ್ಯವಿಲ್ಲ ಎಂದು ನ್ಯಾಯಾಲಯ ತಿಳಿಸಿದೆ.

ಕೇಂದ್ರ ಸರ್ಕಾರದ ವಿವಿಧ ಇಲಾಖೆಗಳು, ಅರೆಸೈನಿಕ ಪಡೆಗಳು, ರೈಲ್ವೆ, ಬ್ಯಾಂಕುಗಳು ಮತ್ತು ಸ್ವಾಯತ್ತ ಸಂಶೋಧನಾ ಸಂಸ್ಥೆಗಳ ನಿವೃತ್ತ ನೌಕರರು ಸಲ್ಲಿಸಿದ್ದ ಹಲವು ಅರ್ಜಿಗಳನ್ನು ವಜಾಗೊಳಿಸಿದ ನ್ಯಾಯಾಲಯವು, 15 ವರ್ಷದ ಮರುಸ್ಥಾಪನೆ ಅವಧಿಯ ಸಂವಿಧಾನಬದ್ಧತೆಯನ್ನು ಎತ್ತಿಹಿಡಿದಿದೆ.

ನ್ಯಾಯಮೂರ್ತಿಗಳಾದ ಅನಿಲ್ ಕ್ಷೇತ್ರಪಾಲ್ ಮತ್ತು ಅಮಿತ್ ಮಹಾಜನ್ ಅವರನ್ನು ಒಳಗೊಂಡ ವಿಭಾಗೀಯ ಪೀಠವು, ಸಿಸಿಎಸ್ ಕಮ್ಯೂಟೇಷನ್ ರೂಲ್ಸ್ ನ ನಿಯಮ 10-ಎ ಹಾಗೂ ಇತರೆ ಪಿಂಚಣಿ ಯೋಜನೆಗಳ ಸಮಾನ ನಿಯಮಗಳ ವಿರುದ್ಧದ ಸವಾಲಿನಲ್ಲಿ ಯಾವುದೇ ತಾರತಮ್ಯವಿಲ್ಲ. ಕಮ್ಯೂಟೆಡ್ ಪಿಂಚಣಿಯ ಮರುಸ್ಥಾಪನೆಗೆ ನಿಗದಿಪಡಿಸಿರುವ 15 ವರ್ಷದ ಏಕರೂಪ ಅವಧಿಯು ಕಾರ್ಯಸಾಧಕ ಮೌಲ್ಯಮಾಪನ, ತಜ್ಞರ ಶಿಫಾರಸುಗಳು ಹಾಗೂ ದೀರ್ಘಕಾಲದ ಕಾನೂನುಬದ್ಧ ಪದ್ಧತಿಯನ್ನು ಆಧರಿಸಿದ ಜಾಗೃತ ನೀತಿ ನಿರ್ಧಾರವಾಗಿದೆ. ಇದರಲ್ಲಿ ಸಂವಿಧಾನಾತ್ಮಕ ದೋಷವಿಲ್ಲ" ಎಂದು ಅಭಿಪ್ರಾಯಪಟ್ಟಿದೆ.

ಮುಂದುವರಿದು, "ನಿವೃತ್ತ ನೌಕರರು ಸ್ಪಷ್ಟವಾದ ಕಾನೂನುಬದ್ಧ ಷರತ್ತುಗಳ ಅಡಿಯಲ್ಲಿ ಸ್ವಯಂಪ್ರೇರಿತವಾಗಿ ಪಿಂಚಣಿಯ ಒಂದು ಭಾಗವನ್ನು ಕಮ್ಯೂಟ್ ಮಾಡಿಕೊಂಡು ತೆರಿಗೆಮುಕ್ತ ಮೊತ್ತವನ್ನು ಪಡೆದ ನಂತರ, ಆ ಆಯ್ಕೆಯ ಕಾನೂನು ಪರಿಣಾಮಗಳು ಯೋಜನೆ ಮಾನ್ಯವಾಗಿರುವವರೆಗೆ ಅನ್ವಯಿಸುತ್ತವೆ. ಪಿಂಚಣಿದಾರರು ಯೋಜನೆಯ ಲಾಭವನ್ನು ಉಳಿಸಿಕೊಂಡೇ ಅದರ ಷರತ್ತುಗಳನ್ನು ಮಾತ್ರ ತಿರಸ್ಕರಿಸಲು ಸಾಧ್ಯವಿಲ್ಲ" ಎಂದು ನ್ಯಾಯಾಲಯ ಹೇಳಿದೆ.

*ಪ್ರಕರಣದ ಹಿನ್ನೆಲೆ*

ಕೇಂದ್ರ ಸರ್ಕಾರದ ವಿವಿಧ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸಿ ನಿವೃತ್ತರಾದ ಸಿಬ್ಬಂದಿ, ಸಿಸಿಎಸ್ ನಿಯಮಗಳ ನಿಯಮ 10-ಎ ಅಡಿಯಲ್ಲಿ 15 ವರ್ಷಗಳ ಕಾಲ ಕಮ್ಯೂಟೆಡ್ ಪಿಂಚಣಿಯನ್ನು ಕಡಿತಗೊಳಿಸುವ ಪದ್ಧತಿಯನ್ನು ಪ್ರಶ್ನಿಸಿದ್ದರು.

ಪೇ ಕಮಿಷನ್‌ಗಳ ಶಿಫಾರಸುಗಳ ನಂತರ ಕಾರ್ಯಸಾಧಕ ಅಂಶಗಳಲ್ಲಿ ಬದಲಾವಣೆ ಆಗಿರುವುದರಿಂದ, ಸರ್ಕಾರವು ವಾಸ್ತವವಾಗಿ ನೀಡಿದ ಮೊತ್ತಕ್ಕಿಂತ ಹೆಚ್ಚಿನ ಮೊತ್ತವನ್ನು ವಸೂಲಿ ಮಾಡುತ್ತಿದೆ ಎಂದು ಅವರು ವಾದಿಸಿದ್ದರು. ಹೀಗಾಗಿ ಮರುಸ್ಥಾಪನೆ ಅವಧಿಯನ್ನು 15 ವರ್ಷಗಳಿಂದ 12 ಅಥವಾ 13 ವರ್ಷಗಳಿಗೆ ಇಳಿಸಬೇಕು ಎಂದು ಕೋರಿದ್ದರು.

ಈ ಬೇಡಿಕೆಗೆ ಬೆಂಬಲವಾಗಿ ಪಿಂಚಣಿ ಮತ್ತು ಪಿಂಚಣಿದಾರರ ಕಲ್ಯಾಣ ಇಲಾಖೆ, ದ್ವಿತೀಯ ರಾಷ್ಟ್ರೀಯ ನ್ಯಾಯಾಂಗ ವೇತನ ಆಯೋಗದ 2021ರ ಪೂರಕ ವರದಿ ಹಾಗೂ ಕೇರಳ ಮತ್ತು ಗುಜರಾತ್ ರಾಜ್ಯಗಳ ಪಿಂಚಣಿ ವ್ಯವಸ್ಥೆಗಳನ್ನು ಉಲ್ಲೇಖಿಸಿದ್ದರು.

ಆದರೆ, ಈ ವಿಷಯವು ನೀತಿ ನಿರ್ಧಾರದ ವ್ಯಾಪ್ತಿಗೆ ಸೇರಿದ್ದು, ಅದರಲ್ಲಿ ಹಸ್ತಕ್ಷೇಪ ಮಾಡಲು ಸಾಧ್ಯವಿಲ್ಲ ಎಂದು ಕೇಂದ್ರ ಆಡಳಿತ ನ್ಯಾಯ ಮಂಡಳಿ (ಸಿಎಟಿ) ಈಗಾಗಲೇ ತೀರ್ಪು ನೀಡಿತ್ತು.

*ನ್ಯಾಯಾಲಯದ ಅಭಿಪ್ರಾಯ*

ಪಿಂಚಣಿಯ ಕಮ್ಯೂಟೆಡ್ ಮೌಲ್ಯವನ್ನು ಕೇವಲ ವ್ಯಕ್ತಿಗೆ ನೀಡಿದ ಮೂಲಧನದ ಮರುಪಾವತಿಯಾಗಿ ಲೆಕ್ಕ ಹಾಕುವುದಿಲ್ಲ. ಜೀವಿತಾವಧಿ ನಿರೀಕ್ಷೆ, ಮರಣ ಪ್ರಮಾಣ, ರಿಯಾಯಿತಿ ದರಗಳು ಹಾಗೂ ಮುಂಗಡ ಮರಣದ ಅಪಾಯ ಸೇರಿದಂತೆ ಹಲವು ಕಾರ್ಯಸಾಧಕ ಅಂಶಗಳನ್ನು ಪರಿಗಣಿಸಿ ಅದರ ಮೌಲ್ಯ ನಿಗದಿಯಾಗುತ್ತದೆ ಎಂದು ನ್ಯಾಯಾಲಯ ತಿಳಿಸಿದೆ.

ಕಾಮನ್ ಕಾಸ್ ವಿರುದ್ಧ ಭಾರತ ಸರಕಾರ ಪ್ರಕರಣವನ್ನು ಉಲ್ಲೇಖಿಸಿದ ನ್ಯಾಯಾಲಯವು, 15 ವರ್ಷದ ಅವಧಿಯನ್ನು “ಇಯರ್ ಆಫ್ ಪರ್ಚೇಸ್” ತತ್ವದ ಆಧಾರದ ಮೇಲೆ ರೂಪಿಸಲಾಗಿದ್ದು, ಸರಳ ಲೆಕ್ಕಾಚಾರದ ಮರುಪಾವತಿ ಅವಧಿಗಿಂತ ಎರಡು ವರ್ಷಗಳ ಹೆಚ್ಚುವರಿ ಸಮತೋಲನವನ್ನು ಒಳಗೊಂಡಿದೆ ಎಂದು ಹೇಳಿದೆ.

6ನೇ ಹಾಗೂ 7ನೇ ವೇತನ ಆಯೋಗಗಳೆರಡೂ ಈ ವಿಷಯವನ್ನು ಪರಿಶೀಲಿಸಿ 15 ವರ್ಷದ ಅವಧಿಯನ್ನು ಮುಂದುವರಿಸಲು ಶಿಫಾರಸು ಮಾಡಿರುವುದರಿಂದ, ಇದು ಮನಬಂದಂತೆ ನಿಗದಿಪಡಿಸಿದ ಅವಧಿಯಲ್ಲ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.

ಅಂತಿಮವಾಗಿ, ಪಿಂಚಣಿ ವ್ಯವಸ್ಥೆಯ ಒಟ್ಟಾರೆ ಸಮತೋಲನಕ್ಕಾಗಿ ರೂಪಿಸಲಾದ 15 ವರ್ಷದ ಮರುಸ್ಥಾಪನೆ ಅವಧಿಯನ್ನು ನ್ಯಾಯಾಲಯ ಎತ್ತಿಹಿಡಿದು, ಪಿಂಚಣಿದಾರರ ಎಲ್ಲಾ ಅರ್ಜಿಗಳನ್ನು ವಜಾಗೊಳಿಸಿದೆ. ಹಾಗೆಯೇ, ಮಧ್ಯಂತರ ಆದೇಶಗಳ ಮೂಲಕ ತಾತ್ಕಾಲಿಕವಾಗಿ ಸ್ಥಗಿತಗೊಂಡಿದ್ದ ವಸೂಲಾತಿಯನ್ನು ಒಮ್ಮೆಲೇ ವಸೂಲಿ ಮಾಡದೆ, ಮಧ್ಯಂತರ ರಕ್ಷಣೆಯ ಅವಧಿಗೆ ಸಮಾನವಾದ ಹೆಚ್ಚುವರಿ ಅವಧಿಯಲ್ಲಿ ಮುಂದುವರಿಸಬೇಕೆಂದು ನಿರ್ದೇಶಿಸಿದೆ.

ಪ್ರಕರಣದ ಶೀರ್ಷಿಕೆ: ಭಾರತ ಸರಕಾರ ಮತ್ತಿತರರು ವಿರುದ್ಧ ಸಬ್ ತ್ರಿಲೋಕ್ ಚಂದ್ ಮತ್ತೊಬ್ಬರು

✍️ ಪ್ರಕಾಶ್ ನಾಯಕ್, ಹಿರಿಯ ಶಿರಸ್ತೇದಾರರು, ನ್ಯಾಯಾಂಗ ಇಲಾಖೆ, ಮಂಗಳೂರು